"Music and Minorities 2026" ICTMD Study Group on Music and Minorities
Սեպտեմբերի 7-12-ը Երևանում կայանալու է ICTMD (https://ictmd.org/ ) - «Երաժշտություն և փոքրամասնություններ» ուսումնասիրությունների խմբի 13-րդ միջազգային սիմպոզիումը։ (https://music-minorities.sci.am/ ) 
Բարձրագույն կրթության և գիտության կոմիտեի աջակցությամբ իրականացվող Սիմպոզիումի կազմակերպիչներն են ICTMD-ն (International Council for Traditions of Music and Dance), ՀՀ ԳԱԱ-ն և Արվեստի ինստիտուտ/ Institute of Arts-ը՝ Երևանի Կոմիտասի անվան պետական կոնսերվատորիայի և «Կայթ մշակութային հանգույց»-ի հետ համագործակցությամբ։
Ինչպես նշված է ՀՀ ԲԿԳԿ-ի հարթակում / https://surl.li/kybsis /, Սիմպոզիումի աշխատանքներին կմասնակցեն շուրջ 90 գիտնականներ և երիտասարդ հետազոտողներ աշխարհի 33 երկրներից՝ փոխգործակցության արդյունավետ հարթակ ստեղծելով հայաստանյան և միջազգային հետազոտողների համար՝ կիսվելու իրենց փորձով և քննարկելու էթնիկ, մշակութային ու լեզվական փոքրամասնությունների երաժշտական ավանդույթների պահպանման հարցերը:
🔹Սիմպոզիումի պաշտոնական կայքէջից տեղեկանում ենք, որ Երաժշտության և պարի ավանդույթների միջազգային խորհուրդը (ICTMD) համաշխարհային գիտական կազմակերպություն է, որը նվիրված է երաժշտության և պարի ուսումնասիրությանը, կիրառությանը և փաստագրմանը՝ դրանց բոլոր մշակութային համատեքստերում։ 1947 թվականին հիմնադրված  ICTMD-ն միավորում է հետազոտողների, կատարողների, մանկավարժների և մշակութային ոլորտի մասնագետների աշխարհի տարբեր երկրներից։ Իր ուսումնասիրական խմբերի, գիտաժողովների, հրատարակությունների և համագործակցային նախաձեռնությունների միջոցով ICTMD-ն խթանում է միջազգային երկխոսությունը, աջակցում է էթնոերաժշտագիտական և էթնոպարագիտական հետազոտություններին, ինչպես նաև նպաստում է ոչ նյութական մշակութային ժառանգության պահպանությանը։ Կազմակերպությունը սերտորեն համագործակցում է ՅՈՒՆԵՍԿՕ-ի հետ և հանդիսանում է երաժշտական ու պարային ավանդույթների վերաբերյալ գիտելիքների փոխանակման առաջատար միջազգային հարթակ։
🔹ICTMD-ի «Երաժշտություն և փոքրամասնություններ» ուսումնասիրական խումբը հիմնադրվել է 1999 թվականին՝ միավորելու այն երաժշտագետներին և պարագետներին, ովքեր աշխատում են սոցիալապես անապահով և հասարակության մեջ թերի ներկայացված անհատների ու խմբերի հետ։ Խթանելով սոցիալական ներգրավվածությամբ հետազոտությունն ու փաստագրումը՝ ուսումնասիրական խումբը ներառում է աշխարհի տարբեր երաժշտական և պարային ավանդույթներ, ողջունում է նոր թեմաներ, միջգիտակարգային ուսումնասիրություններ և նորարարական մոտեցումներ, որոնք նպաստում են գիտական գիտելիքի զարգացմանը։ Խմբի սիմպոզիումները տարիների ընթացքում ծառայել են որպես հարթակ՝ հետազոտական գաղափարների փոխանակման, նոր միտումներին ծանոթանալու և ապագա գործընկերների հետ կապեր հաստատելու համար։
Այս ուսումնասիրական խմբի նպատակների շրջանակում «փոքրամասնություն» հասկացությունը վերաբերում է համայնքներին, խմբերին և/կամ անհատներին, ներառյալ բնիկ ժողովուրդներին, միգրանտներին և այլ խոցելի խմբերին, որոնք առավել ենթակա են խտրականության՝ պայմանավորված էթնիկական պատկանելությամբ, ռասայով, կրոնով, լեզվով, սեռով, սեռական կողմնորոշմամբ, հաշմանդամությամբ, քաղաքական հայացքներով կամ սոցիալական ու տնտեսական անբարենպաստ պայմաններով։
Հայաստանի Հանրապետության մայրաքաղաքն աշխարհի ամենահին անընդմեջ բնակեցված քաղաքներից մեկն է, որտեղ հնագույն ժառանգությունն ու ժամանակակից մշակութային կյանքը ներդաշնակորեն համակցվում են։ Որպես կենսունակ ակադեմիական և արվեստի կենտրոն՝ Երևանը հյուրընկալում է առաջատար համալսարաններ, թանգարաններ, արխիվներ և համերգային ու թատերական հարթակներ, որոնք նպաստում են մտավոր և ստեղծագործական ակտիվ փոխանակմանը։ Քաղաքի հարուստ երաժշտական և արվեստային կյանքը, հյուրընկալ մթնոլորտը և հարմարավետ քաղաքային միջավայրը այն դարձնում են ոգեշնչող վայր միջազգային գիտական հանդիպումների և համագործակցությունների համար։