Հայաստանի պետական ջազ նվագախմբի (գեղարվեստական ղեկավար՝ Դավիթ Մելքոնյան) և Երևանի Կոմիտասի անվան պետական կոնսերվատորիայի համագործակցությամբ համերգային ելույթով ու վարպետության դասով հանդես կգա BUJAZZO-ն՝ գերմանական առաջատար երիտասարդական բիգ բենդերից մեկը, որը համախմբում է շնորհալի երիտասարդ երաժիշտների և առանձնանում հնգաձայն յուրահատուկ վոկալ խմբով։

Bujazzo-ն Գերմանիայի Դաշնային Հանրապետության պաշտոնական երիտասարդական ջազային նվագախումբն է և Գերմանիայի երաժշտական խորհրդի նախագիծը։

Թերեզիա Ֆիլիպի ղեկավարությամբ հանդես եկող BUJAZZO նվագախումբը և հայ դաշնակահար, կոմպոզիտոր Եսայի Կարապետյանը կներկայանան հատուկ համերգով՝ նվիրված Գերմանիայի և Հայաստանի միջև երաժշտական ու մշակութային փոխանակմանը։

Եսայի Կարապետյանը Bujazzo-ի հետ հանդես կգա որպես դաշնակահար և մենակատար՝ ներկայացնելով իր հեղինակային ստեղծագործությունները ջազային նվագախմբի համար կատարված նոր գործիքավորումներով։ Ծրագրում կհնչեն նաև երեք ստեղծագործություններ Հայաստանի պետական ջազ նվագախմբի երկացանկից։

Նախագիծն իրականացվում է Գերմանիայի երիտասարդության հարցերի նախարարության, Գյոթե ինստիտուտի և Հայաստանում Գերմանիայի դեսպանության աջակցությամբ։